Caplutta sogn Luregn e sogn Bistgaun Laus

Igl emprem sanctuari ei staus finius 1587. El ei vegnius consecraus als sogns Luregn e Bistgaun ils 3 d’uost 1592. Ils caputschins han remplazzau quella caplutta cun in baghetg niev, ch’ei vegnius consecraus ils 9 da fenadur 1695 als sogns Luregn, Bistgaun sco era a s. Francestg e s. Antoni da Padua cun treis altars. La davosa renovaziun datescha da 1960.
Descripziun da construcziun
La caplutta mira encunter damaun. Il chor ei serraus sin treis varts, la nav ha in plantschiu su da gep en fuorma d’arviul. Internamein ed externamein ei la preit structurada d’artgs. Sil tetg da siala stat in clutgeret cun tetg octogonal.
Sin la fassada leg’ins ils datums 1592 e 1695.
Ornament
Ils treis altars da lenn dateschan da 1695. Il maletg digl altar grond muossa s. Luregn, s. Bistgaun e s. Francestg. Ils dus altars laterals ein adattai en ina fuorma reducida agl altar grond.

Fontauna: Baselgias e capluttas, spirituals, fraters e soras dalla pleiv da Sumvitg/Giohen e Bernard Bearth, text; Bernard Bearth, fotografias; Ediziuns Desertina, Mustér 1984

Dapli: Laus