Baselgia da Nossadunna Rabius

1589 Ina tabla d’in altaret digl onn 1589 anflada en sacristia, sco era fastitgs da mirs descuvretgs denter la baselgia presenta e la casa prevenida veglia dattan perdetga ch’ils habitonts dil pign uclaun Rabius havevan cheu ina pintga caplutta.
1677-78-79 Las breigias da tschentaners sepagan, il vitg baghegia baselgia en honur da Nossadunna.
1683 Suenter 14 onns astga la nova baselgia da Rabius vegnir consecrada.
1687 Il maletg digl altar grond ei ina copia dil renomau maletg da Nossadunna en la caplutta si Acletta, in’ovra digl artist Nuvolone. Igl onn 1687 ha Fridolinus Eggert, frater e pli tard pader dalla claustra da Muster, copiau quei maletg per la baselgia da Rabius.
1724 Quei onn ha „meister-maler Jacob Rieg“ decorau la baselgia cun 13 maletgs. Quels han ornau ella duront varga 200 onns, avon che vegnir remplazzai 1928 entras quels da A. Bächtiger.
1836 Igl onn 1836 ei vegniu fatg diversas midadas e reparaturas en baselgia e tischamber.
1886 Il vitg vegn pereclitaus entras in grond incendi. Denter ils baghetgs donnegiai sesanfla era la baselgia parochiala. Il niev clutger ei vegnius erigius da vart encunter sera enteifer ils dus onns sissu.
1901 Rabius sefa libers dalla pleiv da Sumvitg e fundescha ina atgna.
1928-1929  Rabius baghegia baselgia nova cun integrar lien entginas parts dalla veglia.
1966 Igl onn 1966 han ins dau alv igl intern dalla baselgia e per part cuvretg vi ils maletgs che dominavan memia zun igl intern dil sanctuari. Il maletg sigl arviul regorda aunc agl artist pictur A. Bächtiger.
1981 Igl onn 1981 ei la caplutta da morts vegnida inaugurada.
2001 Rabius giubilescha 100 onns pleiv e commemorescha quell’epoca cun consecrar la baselgia renovada egl interiur.


Cronica dalla Pleiv Rabius 1901 – 2001 – La baselgia parochiala
da Carli Degonda-Deplazes

Entira Cronica Rabius 2001