Historia

Las pleivs Rabius, Sumvitg-Cumpadials e Surrein ein dapi igl onn 1786 resp. 1901 autonomas. Dapi varga 10 onns han ellas ina stretga collaboraziun. Las pleivs Rabius e Surrein han naven da 1969 in plevon communabel e dapi 9 onns pastorescha nies plevon, sur Benny Varghese, las treis pleivs da nossa vischnaunca.
Igl ei documentau che gia da fetg vegl enneu hagi ei dau ella vischnaunca da Sumvitg baselgias e capluttas en tuts vitgs ed uclauns. Quellas s’udevan pli da baul tuttas tier la pleiv da Sumvitg.
Suenter diras e stentusas contractivas eisi reussiu als convischins da Surrein igl onn 1786 da sedistaccar dalla pleiv da Sumvitg e fundar in’atgna pleiv. Quei ei stau pusseivel mo cun sustegn dalla curia, denton encunter gronda opposiziun dils parochians dalla pleiv da Sumvitg da l’autra vart dall’aua. In dils motivs principals che quei ei la finfinala insumma stau pusseivel era la colligiaziun denter il vitg da Surrein e Sumvitg che era lu duront la stad muort auas grondas e bovas e duront igl unviern muort grondas nevadas buca adina pusseivla. Savens saveva buca vegnir purtau ils affons al sogn batten ed era buca las baras en santeri a Sumvitg.
Igl onn 1901 sefan era ils convischins da Rabius libers dalla pleiv da Sumvitg e fundeschan in’atgna pleiv. Dapi lu ein quellas treis pleivs en vischnaunca stadas autonomas.
Cun Daniev 2017 sefa la nova pleiv „la Pleiv Sumvitg„, fusiunada ord las treis pleivs Rabius, Sumvitg e Surrein.
 ….

Set da meisa creaus da Christoph Berger, Muster